கொல் அல்லது கொல்லப்படுவாய்

உன் வெள்ளை அணுக்களுக்கு
 நன்றி சொல் இது நாள் வரை
 உன்னைக் கவசமாய் காத்ததற்கு

 குரல் வளைப்பெட்டியின் ஸ்ருதி
 கக்குவானில் அடைபடக் கணைக்கிறாய்
 உன் ஆரவாரத்தின் சீவாளியை
 துருத்தியாய் மாற்றி ஒலிக்கிறாய்

 என்ன மந்திர உச்சாடனம் தினமும்
சாப அகழியில் யாரைத் தள்ளிவிட
 குருட்டு நிறங்கள் வாரி இறைத்து
 தப்பிக்கலாமென தந்திரம் போடுகிறாய்

 இஸ்திரி மடிப்பின் ஒழுங்கில்
 உடல் நுழைத்து உருப்பெருக்கும்
 உன் ஆன்மா அரை ஜீபி தரவுகள்
 தருமா தந்திரங்கள் கழித்தால்?

இட பிங்கள மூச்சடக்கலில்
 தைமஸ் பான்ஸாய் துளிர்த்ததா?
யோக யாக வாணவெடிகள்
 டெஸிபல் வலுவில் சிதைந்ததோ?

அகங்கார ஒடுக்கலை உபதேசித்தே
 ஆக்கிரமிப்பின் விஸதாரம் நாளும்
 கொல் அல்லது கொல்லப்படுவாய்
 உன் மந்திர அஸ்திரம் இவைதாமே?