கார்ப்பரேட் க்ருஷ்னா தோழமை அறியார்

கணுக்காலில் கொலுசு பூட்டியது
 குழி விழும் அமிழும் தசை வீக்கம்
 மூத்திரம் பிரிய முக்கால் மணி
 கனத்துக் கிடக்குது கண் இமைகள்

 மனம் மட்டிலும் சோர்வற்று
 பற்றுக்கம்பிகள் நீட்டிப் படரும்
 உதயத்தில் நாலு அஜெண்டா நச்சென
 மாலைக்குள் பூக்க வேணும் நாலும்

மகிழம்பூ விருப்பத்தில் மரமல்லி ஒவ்வாது
 மூச்சிரைக்கஓடி கோட்டைத்தொடனும்
 முந்திரியும் மாம்பழமும் ஒரே இனம்
 கருத்தரங்கு கூட்டி காட்சிப் படுத்தனும்

 எல்லாம் உதய அஸ்தமன தொடருக்குள்
 குருதி முடுக்கம் தலைவலி இடிக்கும்
 அபிமன்யூ சாகவும் அஸ்வத்தாமன் அலையவும்
 அனைத்தும் முன்னமே அறிந்திடும் பரமன்

 கருடனாய்ப் பறந்து இரை குவிமையம் தேடி
 காலில் இடுக்கி காத தூரம் ஏகும் கழுகு
 அன்பு நட்பு உறவுகள் சாத்தியம் கடந்த
 கார்ப்பரேட் கிருஷ்ணா தோழமை அறியார்